(الجزء الأول )
باش أغا
شعر
محمد رمضان
الشاطر حسن
روحت لحبيبتي منتحل..
شخصية الواعظ حسن
نزلت من فوق الفرس
وضربت بالكرباج جرس
فتحوا بيبان القصر
من غير بوابين
لمحت ف الداخل حرس
بيعمروا كلاب المجاعة
بالسنان المرعبة
خلعت ريش الأغربة من عمتي
بصوا عليه الطباخين بصة قلق
والكلب عايز ينطلق
خلف اللي شاطر
واللي خاطر حسنها
خرجت من قصر الملك
شايف عروسة بزمبلك
وقفت تحت الجزوارين
فتحتلي شباكها القماش
م الميه نعل الجزمة باش
لو تسمحي..
هاتي ضفايرك طوق نجاة
هاصعد عليهم حبه حبه لغرفتك
ويحصلوني على الأثر
المشط في الشعر إنكسر
علشان ضفايرك مجدولين
أنا كنت ماشي ف يوم حزين
قابلت واحدة بعكازين
شافتني فكت طقمها
وباستني بعظام اللثة
وملت لي بقي بالرضاب
كان نفسي أنام تحت السحاب
ساعة شتا
وأحط فوق تحتي الغطا
لكن لقيت إن القمر واقف ما بيننا
بيتنظر علشان يبل الكليتين
لابس عباية وأسطره
أهديت لصاحبي مسطرة
زعل وقالي صغيرة
دفعت له فرق المقاس
بنيت عمارة بدون أساس..
علشان تقع
لقيت صوابعي خمس بقع
والجلد تحت القفزات مليان رقع
قلعتهم من غير رباط
لبست جلد الجزمة شاط
كل اللي لابس مقعدة
مسعود بيغزل مسعدة
طلعته فتلة معقدة
ربطها أسفل نحرها
كرّتها من تحت الغطا
وبقت فتاتي وأنا الفتى
البنت ماشية تخيلت
إن الولد سرير في أوضة ودبلتين
خدها المنجد ع الوتر
ضربها بالقوس باتنطر
بين الحديد والمطرقة
ف عضمة حس بطقطقه
سرقوا صديقي ف سونته
وأخذوا سراوله الورق
وهوا قاعد ينتظر
ياخدوا بقايا فانلته
لكنهم ضحكوا عليه
وسابوه يروح للعيال
ومعاه عشا
طعمية سخنة وكام رغيف
كان ليه صاحب مش ظريف
حكا لي نكته مهذبة
أخرجت صوت من شفتي
مليان شتيمة وكركبة
إحمر وجهه من الخجل
كان نفسي اقول ليكم زجل
لكن لقيت الشحاتين
رفعوا عليه قضيتين
واحدة.. إثارة بلبلة
والتانية.. لسة مؤجلة
ناديت محامي طويل عريض
ضحك عليه وقال مريض
حوالت أصلح نظرتي
فقالولي خلي فرختك تدن قوام
نديك مخالصة بالصكوك
فتحت ليهم شنطتي
واديت لهم بيض الديوك.
طيارة ورق
أضحك وأحاول أبتسم
لما أفتكر أيام طفولتي المبهمة
أيام ما كنت
باجيب عصايا مكسرة وحبة ورق
وأعمل هياكل طيارات
وأعلب وأضحك وأرتمي
فوق التراب
ميهمنيش
إن الفانلة اتوسخت
علشان تسأفلي العيال
والدوري لم يتبدي
تحصل عليه المشكلة
وخناقة من بين الفرق
وأسيب عبطهم
بين عفار المتش
والفوز الغبي
وأفك من فوق العصا..
الخيط عشان تبعد وتعلى لفوق قوي
وأقعد على كتلة حجر
وأبص بالعين الشمال
وأبص بالعين اليمين
أصل المريا إتثبتت
بالصمع من فوق الورق
تبعد وتبعد ف الفضا
أشعر بأني باتخنق.. بفنلتي
لما أبويا يشدني منها..
لأن الليل دخل
وسبت يومها الخيط يضيع
لكن ما زال يشدني.. وتشدني
صورتي اللي من فوق الورق
بالإبتسامة المؤلمة
لما بشوفها ف الفضا
طايرة ولكن بانخفاض
والناس بتجري وتستخبى..
وترتعش منها العيال
اللي انطرح.. واللي انجرح..
واللي اندبح بفنلته
قطعا لأن الليل دخل
وأقعد على كتلة حجر
وأبص بالعين الشمال
وأبص بالعين اليمين
وأهز راسي هزتين
وأعرف بأن الخيط فلت
وأعرف بأن الخيط..نقط
الخلاص
رسمت فوق جسمي الذي
علامة استفهام
حلقولي راسي صريخ
حتى عظام الجمجمة
بانت جميع الأوردة..
في مخي النحاس
ما زلت مربوط في الخلاص
العالم المدهون رصاص
شربت عيونه قسوتي
والجوع في إثيوبيا الرضيع
أنا كبش أفريقيا الرضيع
برضع حطب
شبكت عيني في نحرها بعد الغروب
لوني الصريح عمال
يدوب.. ويدوب.. يدوب
لكن ما زال ماسك ف عينها وف العظام
إحساسي من أقصى الجنوب حتى الجنوب
مليان رخام
الشمس طالعة ف معدتي حط إستوا
عايش ما بين ثقب الأوزون..
والأبخرة المتصاعدة من جلدكم
عمق الرئة
من بين سنانكم شفت أمعائكم
وباغرق فيكوا للأنثى عشر
الإيدز فينا بينتشر
وهربت للجوع والجفاف
غنولي مرة للرجوع
ومرة تانية عشان أخاف
وأنا الي خوفتوني بيه
هو أنا
فتحقونني دم خيل
ولتسحبوني لمصلكم
لن ترعبوني بالصراخ
أنا منتهى صوت الألم ف الحنجرة
لن ترعبوني باللهب
مزروع ف قلبي جهنمة
أنا كبش أفريقيا الرضيع
والجوع ف إثيوبيا بياكل جتتي
حلقولي راسي بخنجرك
حتى عظام الجمجمة
وما زلت مربوط في الخلاص
أنا منتهى هذا المدار
وما زلت باحلم بالخلاص.
في العاصمة
نظرة عيونك مبهمة
أشياء سيقانها من الخشب
عبروا الخطوط للبترينات
والناس تبادلوا الأرصفة
الليل بيضحك ع النهار
والضهر من ألوان قزح
زي الضباب
والعصر مغرب وإنحنى
عيني الشمال شافت غلط
والتانية كانت آثمة
وشفايف الوهم إنطوت
والناب ظهر من خلفها
بيقطر الحبر ف ورق
ناوري يسطر ملحمة
عرقي نزف
نفسيك إنكتم
شدوا حبال الصوت بعيد
خنقوا كلامي ف الوريد
والسيارات عدت عليه بدوق قلق
والعضم طقطق وإنتنتى
في العاصمة
الليل لعوب
والضلمة واضحة في الدروب
والنور للزينة وحاجات لل....
والبنكنوت صوته علا
والكاس مشي جوا العيون
صوته موسيقي ودندنة
شديت لجامي بكل خوف
جوا الطريق المستقيم
مليان حاجات زي العيون
بابه الشمال عين الجمل
بابه اليمين عين التنين
بص الحصان ليه بعينه مدمعة
فوقعت عند المنحنى
بعت الحاجات
علشان أعيش في العاصمة
ونزلت في النهار الغويط
وشربت من قاعه النقي
لكن في لحظة شدني
والميه جذبت نفسها..
بين الشطوط
وقالتلي منك عاصمة.
العالم الثالث
عروسة وزفة في الشارع
وميكروفونات
فراخ فاسدة.. وأكل كلاب
غلاء أسعار.. وفقر مهين
حشيش أفيون.. إبر مورفين
وشم وجنس وبذاءة
كلاب ضالة
بدل.. قمصان منشية
روتين قاتل
أنيميا وموت ومستشفى
لبن إشعاع
شجر ميت
جفاف فيضان
فنون هابطة
فضا وضياع
بذخ فاجر
خدم سواق
حشم وبطانة ومنافق
بطالة وضغط للإنفاق
عياط وشحاته ومدارس
زبالة وحفرة ومجاري
نفير عالي
زحام قطارات
عساكر واقفة في الدورات
زعيق ونهق
ذباب وناموس
حمار مجرور ف عربية
ونص الصورة كان باين
غراب مسلوخ على هيكل
وريشه خارج الهامش
بيعمل نفسه شمبنزي
عشان ياكل سباطة موز
يقف ملووح على دماغه
ويتشعبط ويتنطط
ويهرش تاني في صداغه
وإيده التانية فوق صدره
ويتدور بيان منه الحمار واضح
فيتدور يمد لسانه للخارج
ورغم الموقف الواضح
ما زال في الصورة يا صاحبي
شباب واقف على العمدان بيستنى.
شاه بندر التجار
شاه بندر التجار
بانت سنانه كتار
أكل حقوق الناس
وباعها قطاعي
والكل بيطاطي
واللي تبان راسه
هايدوق لهيب النار
....................
شاه بندر التجار
بانت ودانه كبار
فجعلها للتخزين
فاض الكلام فيها
فتح الزاد علنا
قرب تعال وشوف
هانبيع غداً أسرار
....................
شاه بندر التجار
بانت جيوبه كبار
واللي بيتمنى
يجي هنا يركع
يفتح إيديه ياخد
يصرف على كيفه
ويقدم إستغفار
....................
شاه بندر التجار
بانت شفايفه كبار
باع الكلام للناس
من غير تمن واضح
لكن ف دفع الدين
كان الشرف عمله
ما أبخس الأسعار
....................
شاه بندر التجار
بانت عيونه كبار
شاف الجميع أقزام
هجموا عليه ياكلوه
ف حالة إستنفار
قبل كالمه هزار
...................
شاه بندر التجار
واخد قوام زيبق
زي الهوا لو طار
باع الجدار والباب
وهو فيه مسمار
شاه بندر التجار
شاه بندر الفجار.
عيون
شايف عيونك
شيء خرافي مستباح
لكن ومين يقدر يمر من الرموش
سبقني طيفي قبل ما وصل للهدف
لما وصلت ملقتوش
لو تسمحوا لي يا حرس
أدخل ف عينها لحظتين
لحظة سجين زندا.. ولحظة راسبوتين
تك .. تك .. تك
أشكر إيديكم ع الملأ
لما وقعت على الجبين ..
نفضت ضهر فانلتي
علشان أزيل المرتجف
وأدخل ف آخر منعطف
وارسم عيونك أفئدة
وأرسم شفايفك أوردة
وأدخل ما بينها مختفي
داخل نغم نايي الحزين
يمتصني دملك رحيق
وأبقى كرات بيضاء وكرات حمرا..
وبلازما ف نبضك
مدفوع في كل الأوردة
وأبقى في دمك والخلايا
شيء ضروري بيأمرك بيه الجمع
لو تسمحوا.. أبقوا افتحوا
عينها الشمال قبل اليمين
علشان خروجي لن يتم
في دفعة واحدة ودفعتين
هاخرج دموع
هاخرج كما لحظة دخولي ناي حزين
ولما دمك يرتعش لحظة غيابي..
وتنقطع منك خيوطي
إبقي هاتي ليه كفنك من تابوتي
وأحضنيني.. أحضنيني
بس موتي.
سندوتش للكلاب
أتلحف الخوف اللي باقي في وحدتي
وأسد ودني بالمخدة والرياح المرعبة
وأنام على طرف السرير
أحلم بسوق العيش
وتنهيدة رغيفك يا حبي لما يبقى يستوي
أحلم بنبوت الغفير
تتمد إيد وتشدني
أمشي في ضلمة سكتك
تعوي كلاب الليل عليه
أرتمي في حضن القلق
وأحضن حيطان الخوف..
بكتفي وأنزوي
ألقي عنانك يلتوي
وكلاب حارتنا تصدني عن وجهتي
وألقى وداني أتبعرت منها الحروف
وأفوق على هزة كتافي..
بالمخالف والعيون والأسئلة
وأرفع على كتافي الألم
وأبيع بقرش وأبيع بصاغ
ويجيني طفل هدومه بالية مقطعة
من يوم ما شفته وهو لسه ف لفته
الدنيا هيه ضحكته
لكن سنانه مكعبلة
خايف تبان فاضطر
يكتم ضحكته
يمضغ ويبلع ف الألم
وألف كيس ياخده معاه
ويقولي كله على الحساب
أضحك وأداري ف ضحكتي
جوا البضاعة الغير مباعة للولد
وأسأل سؤال؟
لما أروح للفرن وبتاع الخضار
يدوني آكل ع الحساب !
يدوني آكل ولا يدوا للكلاب ؟
أجري لسوق العيش وأهمس ع الملأ
أنا أعلى جداً منهم
أجرى وحاضن سكتي في حضن الطريق..
تعوي الكلاب
إزاي أعدي للعيال؟
وارمي القدر وأرمي الحصا
وأحط قدامهم رغيف
طين الشتا ويا الكلاب
إزاي أعدي والرغيف يفضل نضيف!
إزاي أمر..؟
يااااه اللعاب في الحلق مر
المستحيل إنك تعدي بكل شيء
يا تعدي قدامهم بطيفك
يا تحط لحمك فوق رغيفك
......................
ثلاث محاولات لمرور
زحفت من فوق الرصيف
نامو الكلاب..
على شكل فخ بدون حدود
عينهم بسترج إنما
صوت الولاد بيشدني
علشان أمر بدون تردد كله موت
ووصلت آخر مرحلة
على إيدي قمت وركبتي..
علشان أأقف
الرعد قام طلقات نباح..
وقدرت أهرب م الفزع
محاولة ثانية:
قدمته ليهم مبتسم
قلبوه لقوه وش الرغيف
رفعوا ديولهم في المدى
خرجت سيوفهم والمُدى
أطلقت ساقي للرياح
سابقوا سيقانهم للعواصف تكتسح
فخرجت من وسط التراب
ماسك في إيدي معدتي وضهر الرغيف
محاولة أخيرة:
خلعت من صدري القميص
وحدفت نفسي وسطهم..
ويا اللي باقي من الرغيف
مفضلش غير قدر الزلط
فغرفت وياهم طبق.
المطر
إفتحيلي أي باب
وأمنحيني لأي حارة أو زقاق
الشتا خلاني أحضن ف الحيطان
وأغرز ف طينة ممزلقة
طرقك حقيقي مؤلمة
شبابيك بتفتح ع الغرف
الشيش مفارق
والمناظر مقرفة
فيه ناس بتحضن ف النجوم
وناس بتحضن ف لحفة
فيه ناس عبيطة مقرفصه
وناس بلتهث م الدفا
نور ضعيف
بس العنين متعودة
فوق السلالم تحتها
تلقى الجتت فوق الجتت
والميه نازله من سطوحك ع الجيران
الجزمة لسة ممزلقة
أجري وأصرخ وأنكفي
لو ترتعش مني الحيطان
واتخنق جوا الطريق
أجري واصرخ وأنكفي
والبحر يحضن في الغريق
أنا موتي فيكي
لو ها يبقى المشكلة
حاولي تقومي وتبعديني عن الطريق
ولتمسحيني دم كاتب بيه.
يفط فوق الحيطان
أو تقفلي ف وشي السدود
قومي وقومي
كسري كل الشجر
دوسي للي باقي من الورود
قومي أحرقي كل الخرايط..
ع السكك
أنا نفسي أجيلك إنما حددت حالا موفقك
إنك غريبة وأطلسك
من غير حدود.
عرف الديك
شايف ف عيون الناس طرابيش
سامع أصوات الناس قراقيش
بربشت بقلبي اللي مغمض
علشان بتكعبل ف رصيفك
ساعة م أرحل م الناحية دي
وأخبط في عمود النور دايما
علشان أضواءه .. مطفية
أسلاكه البارزة بتندهلي
وتهز كياني في آخر الليل
فداريت نفسي جوا قميصي
لكن خايف..
لتشوفني زرايره الوهمية
وتشد على رقباتي الياقة
تطلع من عيني كتير أشكال
ويزيد الضغط على رقبتي
أهرب من جلدي وأتدارى..
ف داخل لحمي
يتقشر جلدي ويتركني..
مكشوف ليكم واضح جدا
أهرب من لحمي وأتدراى..
جوا نخاعي
أملا في تكويني..
وأسيب بره نص دراعي
والنص التاني ف بق الحوت
كان نفسي أعيش زي الكتكوت
لكن خايف لأكبر وأصيح
والديك مش ممكن يستنى
لو فيه في العشة أكتر من ديك
لو ممكن أسيب عرفي معاكم
لكن خايف لأرجع ملقاش
لا جناح ولا ريش
وأصبح قرايش
وأدور على عرفي الضايع
وأستسلم في الأخر ليكو
وأكاكي معاك وأكاكي.
الفاكهة المستحيلة
استحالت كل ألفاظي..
الجديدة والعتيقة..
إني أهرب من رضابك
من سنابك حوا قلبي
تعصر الكلمة"اللارنج" بكل قسوة
فوق حنان"رمان" بيحلم..
بللي يقطف منه حبه
أو"شادوك" حب"السفرجل" و"الطرنج"
وألفوا كوكتيل يضافي في قوته..
حجم"الليمون"
فأنتحب أبو فروة..
من طعم اللذة والمذاذة
والجنون الإرتجافي
اربطيني ف كل نخلة..
ورشي فوقي الملح صافي
أستخبى في الل داب جوا"الزيتون"
وأعصرك من كتر حدقي
يبقى حضنك ليك "دوم" نفس"البكان"
أو"لفستق" لسه مش محتاج"لبندق"
يحكي له حدوته بايخة عن"جوافة"..
ف قلبها كل المعاني المستحيلة
أو عصير"جميز" مخبي في قله"توتة"
ينهي بيها أي كلمة ف قلب جوزة
نفسها في جوزها اللي هارب
ويا "منجة " "وبرتقالة "..
شاربه كل البحر"قشطة"
وسايبه"يوسف" كان يفرض..
"كاكي" يحلم بللي يحلم..
يستلذ بطعم قشره
أه يا قشره
لما شاف كل المناظر..
حط عينه فـ"عين جمل"..
محتاج لراوي
كان يكبر في الحكاوي
يرسم الكلمة بغناوي
"وبعنب" يفرط حروفها
فوق"سبوتا" أو"بباظ"
مجهول لجهل البعض بيه
أو وعود إهداء"لمشمش"
فاستباح "التين" كمعنى
بدون ما يعرف إنه مش "برشومي"..
لكن كله" شوك"
والبديل"أناناس".
بيهرب من عيون"البشملة"
و"النبق" كان المسألة لكل الظروف
تتحل كل المشكلة "بجريب فروت"
أو"جاك فورت"
عارفين مجاهل سكتك
فتن عليك"البرجموت"
عن"موز" دبل بعد العفن
لمي الكفن جوا التابوت
"الخوخ" رفض حتى العزا
"تفاحك" المزعوم دبل..
فوق وجنتك
"عرجون" ورافض ينكمر..
م البرد فوق"كمترتك"
لو هيتئي لي.. أو هيئتلك
بجف وأرفض أشربك
زيت النخيل بيرطبك
لكن بحبك بالنوى
فأرمي البلح.. تمرك بخيل
واليوم في برد الليل طويل
كان الدفا..
قبل الفواكه مستحيل.
ــــــــــــــــــــــــــــــــــــــــ
القصيدة جامعة لك انواع الفاكهة فى العالم، والكلمات التى بين علامات تنصيص هى اسماء لفاكهة
الحالة جَزر
الجَزر فوق الشط يحلم بالقمر
والمد يحلم بالرمال
شد الرحال
سافر بلاش تتحدى حد
جدف بلا تستنى ريح
وإرخي الشراع..
الموج يشد
الصاري باعك للهوا
أنا قصدي أقولك..
قعدك فوق الحبال
والدفة ممسوكة بدراع..
بحار عبيط
حاول تخش على الغويط
الحالة جرز..
وملكش عذر إنك تموت
بين القواقع والصدف
الموت قدر
والإنتحار..
مش ممكن إنه يكون صُدف.
المزاد
إنده عشان العمدة
جوز م الفلاحين
وكوزين درة وشيخ الخفر
الواد كفر
من حب عبلة لعنترة
قطع أيدين الفار وخوف به أسد
واخد لقلب في مجلتين
وجريدة باهتة مزيفة
في إذاعة الشرق البعيد
بطل تعيش جوا الوريد
واضرب جناحك ع الملأ..
صحن الحنان منى اندلق..
فوق الغطا
آه يا فتى من نظرتك
من خلف شيش البطانية المزدوج
النصل في الغمد أتعوج من ركنته..
وساب البغال الهائمة..
تاكل وتشرب م المطر
حسيت ف قلبي بالخطر
عمري ف يوم ما قضيت وتر..
من ضحكتي.. ومخدتي
خدها المنجد مرتين
علشان باحب المرتبة متسمرة
حبيت زرافة قصيرة
كوز البطاطا طلع هاجين
فكولي قرد بنسناسين
سنبلت نفسي ورحت فين
أكلتني بقرة معضمة
وشافني يوسف في المنام
وزليخة كانت بهدلة
وعزيز ها كابب الإنجليز..
فوق النديم
لبست بدلة بقيت وسيم
قلعها ليه العسكري
هات لي حلاوة وعيش طري
ها كلها تحت المقصلة
قبل ما تنزل بالقوي
إضرب.. جلا.. وجلجلة
عندي أيدين مقطعة
ورقاب نحيفة مبهدلة..
وكيس هموم مقاس كبير..
وجلجلة
جلاجلا.. جلاجلا.. وجلجلة.
الملمة
أخفيت عيوني من الزبد
وخلعت شرياني الذي
عملوه حبال للمشنقة
ورميته خلف كمنجتي
القوس شرب من ضحكتي
لحن اضطراب المستحيل
الصبح دارى وجنته ف الليل عتم
أنا مش باحبك يا صديقي المستباح
لكلاب حارتنا الضيقة
سُمعة جنابك سيئة
داخل كراريس من خزف
وكل جرو بينتظر
لحظة شبابه الماجنة
علشان يشوفك مرتجف
طعمك حقيقي مختلف
عن أي ضلع بينغمس
داخل كتافي المقلقة
القلب تاهت سكته خلف الرغيف
كان الولد شاعر عنيف
لما عزف لحن النضال فوق جبهتي
كان ناسي إن كمنجتي قوسها طلق..
كل السهام من تحت منتصف الهدف
ملقاش هدف غير الجراح
فرد عليها التوب وراح
والتوب بيشرب م اللهب
أنا بعت كام خاتم دهب
من غير فصوص
كان القزاز وزن الدهب
كان الدهب نص القزاز
وميزاني أصبح أي شيء غير الميزان
اللص أصبح ديدبان
فوق نظرتي المستعجلة لحل الأمور
الفكر جوا الراس طابور
عمال يفور ويفور يفور
والمنفذ المفتوح قفل
على آخر الصف الطويل
هافتح بيباني كمان سنة
علشان تموت الأسئلة
فوق الإجابة المبهمة
الحدوة كانت مؤلمة لرجل الفرس
لو كنت فارس أي شيء
نط الحواجز الموانع والفرص
السرج ع المعصم قرص
برزت عروقي من الصوابع ف الخلا
والفكر أصبح بل بله
فطلبت منه كلمتين
كلمة صريحة لحل تلك المشكلة
وكلمة تانية مشكلة.
حكاية إلاه
هل إنتا ناوي تكون إلاه
ودفعت عربون اللقب..
للعابدين الراقدين الساجدين
للفلس لما يرتعش
للراكعين على الدينار
علشان محدش يخطفه
قالوا زمان..
ف بلدنا حكمة إتنفذت
اللي ما إيده في مقطفه
هايجي واحد يلهفه..
وينضفه.. ويشطفه..ويعصره
ويجي قصاب يجزره
ويغلفه.. ويعلقه.. ويفرمه
ويحطه تحت الساجدين الراكعين العابدين
فيدعوا له
ويقولوا إنه صحيح إلاه
واعي وكريم
فيجي له ملكه الأمين
يلاقي عينه مدمعة..
بسبب البصل..
إللي إيده مقطعة
مع فلفل أسمر ويا ملح ومستكة
وقاله كمل نعمتي ع المحتاجين
وبعد ما يصيبهم شبع
هاتهم هنا متوضيين..
باللي هايبقى من المرق
الواد سرق
قصدى الإلاه
حبة بخور م العطارين
وحرق عليهم لحيته
فولعت اللام وحدها
واللي فضل أربع حروف..
ح .. ي .. ت .. ه
بأيدها الشمال
وقالتله هاتلي لحمتي
أعطاها حتة مشغتة
بصت لها بعين الخبير
وقالتله سرك جوا بير
وقالتلهم ع اللي حصل
فأتوضوا بالمرق المقدس..
وانحنوا لعرش الملك
كان تحته فتة وعيش طري
إتسحب اللص الظريف
سرق رغيف
بركة إلاهه المفتري
شافه الملك
الواد عرف إنه هلك
قام غمزه بسجق استخبى ف الرغيف
ضحك الملاك من فرحته
وباس إيدين لص الرغيف
قدام جميع الجائعين اللي انحنوا..
تحت الدينار
ولما شافوا اللي حصل
أدوا فروض الطاعة للص الظريف
وشهدوا إنه صحيح إلاه
إيده بتتلف في حرير
وقف الإلاه الأولي وقالهم
عليكوا غضبي ولعنتي
حرمتكوا من فتتي
ياما سرقت عشان تعيشوا شبعانين
ودمي له أصل ونسب
يا ما ركعتوا لطلعتي
وسجدتوا لحروف كلمتي
فقالوله إزاي نعبدك!
وإحنا لقينا اللي بيعرف يسرقك..
ويفرقك ع الجائعين..
الراكعين الساجدين
م الجوع أمامك يا غبي
نسبت نفسك لل.....
لو كنت ناوي تكون إلاه
إدفع لنا عربون لقب ودمغتين
وإحنا نكون.. موجه وبحر من النفاق
إخنف وقال.. محلي العناق
والغمز من خلفك مطر
خايفين وحاسين بالخطر.. من طلعتك
أه يا مقدس لو تموت.. وندفنك
ونيجي يوميا على القبر العظيم..
ونرجمك.
حالة صيف
مرت سحابة صيف
صنعت قمر مخنوق
علشان يقول كلمته
لكن في صوته شقوق
تحت السما سراديب
وف قلبه كام خندق
عمال يلف يدور..
داخل مجراته
ينطلق ويتألم وهو فى سكاته
لكن ما زال فضة..
فوق الوشوش بالليل
بحاول أتدارى
في يوم قيامتنا..
علشان أتوه من النار
وتقوم على الواضحين
لغمطت وشي بطين
مليان حصا وغلة
نبّت على خدي
عضم الدرة البلدي
ولعة في أرجيلة
وهربت من جلدي
دورت ملقتهوش
شدو العروق مني
صرخ الولد صوتي ولسه مسمعتوش
فتح الكلام عينه ملقاش
عليها رموش
طلعت حاجات ليه
عفاريت في آخر الليل
من عينه ما بكشش
ضربوا عليه الهون
والهون ما يرنش
لما الولد سبع
جاي م السما محمول
رايح لها محمول
لكن ومين يسمع.
الكلمة مش ممكن تموت
الموج لعوب
وعيون سمايا مدمعة فوق القميص
كل المعاني مقطعة
والرفا مات.. والسقات مات
الحلق ناشف م الكلام
كباية الميه اللجام
أمشي عل طروف الكعوب
حاسب لصوتك يتسمع
إرمي ف ودن الكرسي طين
إغرز ف حلقة السهم مغموس بالعسل
إوعى ف يوم تضرب مثل
الضرب عيب
جات م الغريب
موجة حاجات
مجتش منك للصحاب
مرسومة عينك ع البيبان
مرسومة ودنك ع الحيطان
الصبح أصبح مش جبان
لكن بسرعة بيختفي
باحث في داخل نظرته
عن رخ ماسك منشفة
أو حتى قاعد ينتظر خله الوفي
حطيت وداني ف مقطفي
طولت قوي
والحمل أصبح مش تقيل
القاع غويط
كل للي حاول يعرفه
أصبح عبيط
شارب عيونك أسئلة
ساعة ما كنت باحبها
جريت في دمي كرهتها
إزاي أسيبك للخلاص
دمي في لحمي بينتشر
ذئاب بتنخر ف العظام
تعابين بتسحب في النخاع
سدولي ودني من الصراخ
السكة مليانة بحجارة مكسرة
فوقها الجماجم نبتت
ملهاش ملامح أو حدود
محاولة فاشلة للهرب
جدران سميكة ومزعجة
لكن قصادي سمعت صوت
خمس صوابع في الوبر
عمالة تنقش في الحجر
حجات بتجري وتستخبى وترتعش منها
حلمي الوحيد باب الخلاص
كل الفيران في الضلمة
عاملين مهزلة
كاتبين يفط.. يفط.. يفط..
القط خاب أصبح كفيف
محتاج لصرصار يسحبه
عمال أدور ع الشروخ
عمال أدوخ
محاولة فاشلة للوقوف
رجلي خانتني من القرف
فوقعت رافع جبهتي
زارع ف قلب الضوء..
حروف من كلمتي.
علشان تكون
ألعب على آخر وتر
أسمع نقيق الضفدعة
باع الولد
كل الملابس أشتري
لجام وسرج ومهمازين
رفص الكلام
رفع شفايفه ف الهوا
عارف أصول البرطعة
قمص ومرمغ جتتك جوا التراب
تطول ودانك بالتساوي تهزمهم
علشان تنهق بانتظام
حاسب متزعجش العمد
الليل طويل
والتبن غالي والدريس مغشوش بفول
برق وقرقش واتكتم
حاسب لتغلط أو تقول
دخن سيجارتك وابتسم
تضحك عليك كل العجول والضفدعة
يضحك عليك حتى السمك والشفدعة (1)
التبن والبرسيم نضج..
قوموا إلبسوا
مخله.. وحدوه.. وبردعة.
عملية إجهاض
هامش:
لو كنتي هزيتي النخيل
والجزع نفذ لك طلب
كان الولد..
منك هيشعر بالأمان
قابلك هايكل م الرطب
يروي عيونك م الجدب
يطفي لهيبك م الحطب
زي اليسوع..
اللي ف مهده قال خُطب
القصيدة ..
وزرعنا شجر البرتقال
فتحوا الهويس
درات سواقينا بسموم الإنتحار
مات الشجر من غيب عجب
والأرض بايره بدون سبب
سبحانه من خلق السحاب
قبل الشجر
سبحانه من أنزل مطر
سبحانه من خلى النبات
يشق طين الأرض.. يطلع للقمر
رغم السواقي الدايرة في كل إتجاه
مدينا إيدنا في السراب
للي أتخلق من كوم تراب
نلقى أيدينا في السراب
للي أتخلق من من كوم تراب
نلقى الحقيقة المعجزة
زي الشموس وسط السحاب
ياناس قلق
الأب منه ها يتخلق
والأرض ماسكة في الصراخ
والآهلة منها بتتوصل
والعند ماسك في الذهول
كان إيه حصل..
ساعة ظهوره ومولده
أم الولد ماتت وهيه بتولده
علي بابا والأربعين شاعر
أنا زيكم شاعر
بحبي ف طريق الشعر
وحروفي شداني
بس لطريق الحق
شيلوا الأيدين عني
ها يفيد بإيه الزق
لو كلمتي صادقة
وأنتم كما فرعون
البحر راح ينشق
دا لأني كاتب لكم
قصيدة من شعري
مطلع حروفها لأ
الشعر جوايا
صادق كما الكلمة
وإحنا ف أوان الموت
يا قطر لو تيجي
أوعى تزمر توت
سيبهم كما التايهين
عدى عليهم فوت
كان نفسي أكون يونس
وأسيبكوا يا شعرا
وأعيش بقيت عمري
جوا ف بطن الحوت
نازل ولو طالع
نفسك تكون مظلوم
بتلوم ف كل الناس
وأنت عليك اللوم
الدم لو ينزف
فوق الورق كداب
يا ذئب مين ظلمك
وأنت في بقك ناب
يابو القلم مسنون
إعمل كما نواس
فارس ف مدح هارون
عاش الأمير جعفر
ورشيد بقا مجنون
البحر لو صادق
تفعيلته كدابه
والشعر في مغاره
ناقصة علي بابا
اتسحبت سكاكين
قاصده علي بابا
دا اللي يعاديهم
بيعادي في سحابه
يبكي المطر يبكي
منه علي بابا
مرجانه نشوانة
واخده الدهب
خلاخيل
لابسة دهب وحرير
ديّه على باب
يا شعر لو صادق
تبقى الأسُود غُزلان
والغابة مش غابة
وأكون ف يوم زيكم
يا أكون علي بابا.
حصار المخيم
طفي الكانون
الحلة فاضية
والطبق مليان هباب
فلتحملي..
بالعيش وبالنيفا وبالفول والكباب
الجوع حصار
والضلمة نور والليل نهار
جوا المخيم والأدان صوت انفجار
أستفتي فينا الأفئدة
حرمتوا ليه أكل الكلاب
أكل الولد لحم الشهيد
وحلى هو وأسرته بالمقعدة
دخل النسيج من زوره..
لكن معدته كانت حزينة وموصدة
والصمت كان للكل صوت
فلتمنحيني تحرري
ولتقتلي هذا الذي..
يدعي في شرع الناس ورق
أو بنكنوت.
اليخت بخت يا عين
والطيارات حواليه بتدور
سألت ليه فاتحين الباب
قالولي كان مقطوع النور
ضروري تقف من بره
وأنت النوبة دي عليك الدور
طلع لي قرش معاه بايب
والميه فيه عمالة تفور
طبق جريدة اليوم لكن
غمزلي بعينه الأمور
غمزت له يبعد عني
أو يجي يشرب عندى الشاي
أوعدكوا بحاجات م التانية
لو تعرفوالي هايجي إزاى
