(الجزء الثانى)
وإن لقيت لونكم داكن
ها غير الخطة ولكن
أنا عندى شقة منيش ساكن
فى عمارة كان بابها مضلم
أن كنت نايم باتكلم
سمعنى واحد متزمت
ضرب مراته بدون ما فهم
مش لازم أفهم ولا حاجة
القطة كان محتاجة
للقمة مقطوعة هلامى
أكلت طعام اليوم كله
والباقى حطوه قدامى
أكلت حتى النوم جانى
صحانى م النوم التانى
قعدت فى الضلمة باخطط
إزاى ما بعرفش السكة
والأعمى ماشى بيتنطط
لبست نضارة غويطة
طلعت م الباب ف الحيطة
وطاخ وطيخ ورمت راسى
ربطوها عقدة وشنيطة
وشنيطة دى مُصغر شنطة
جبتها ماما وفيها بطة
ولعب وحاجات
قعدت ألعب وأنا ناسى
والديب أهو فات
على عشة فاضية هجرها الديك
زعل قوى وأصبح أرنب
ملقاش جزر أحمر وأصفر
ولا خس م العال يا مليجى
لما أنت زعلان ليه بتيجى؟
عند الحمار وياك الفار
أشكالكو متقاربة ولكن
الفار نضيف وأنت الأنضف
لبس الحكيم النضارة..
وراح باريس ورجع ماشى
ولجامه ما فهوش زمارة
أن كنت ماسك سنارة
شبكت فى ديل فستان واحدة
ضحكت وقالت بالوحدة
عيب يا فندى
زعلت جدا من نفسى
علشان ماشدتش الغابة
والغابة دى فيها الغزلان
وأسد ونمر وكام تعبان
تعبان من إمبارح يانى
جابولى كام ساعة يبانى
محتاجة تصليح لتور سها
والعقرب الهايص هايص
من غير ما رقاص بيهزه
أو حتى بيلف بترسه
دخلت صالة من البلكون
لأنى ما بحبش ترسو
وترسو دا موضة قديمة بيدخلوه الشبيحة
إيراده لشجيع السيما
ياما ضربكوا الواد عنبة
ولكمته سودة قديمة
طلعلى بترول فى الحمام
رحت اشتريت كام بريمة
أتارى بترولهم كاذب
كل البشر من طين لازب..
وأنت اللى من مارج من نار
عمال بتغوينى أجيلك
وأنا اللى بيعوزنى بيجنى
ما بروحش لحد
بعت لك جوابات
مستنى حد يقولى إتهد
والله عيب هو أنا من طوب
أو حتى مصبوب ف العمدان
نص البشر أبيض وأسود
والتانى نص ملوش ألوان
إظهر وبان لو كنت جبان
علشان أقطع من لحمك
وأديه لكلب يكون له سنان
طلعلى نمر ملوش مخلب
وفهد م النوع الإنسان
ميّل عليه وقال ليه
أسد أسدكو أكل ليه
أكلت ليه كل اللية
وليته كانت ليه
وهو له ليه وليه
ليه ياكلها وقدامى..
ويقول أكلها ومش ليه
أنا قلت له ليه الليه
وليك يا صاحبى كمان ليه
وليتى كانت ليه
أنكر وقال إنه ما كلش
غير البطاطس والخرشوف
فتحت بقه عشان أشوف
لقيت سنانه عليها قرون
وفوق لسانه فرو خروف
وبين صداغه كمان لية
هافتش الكل وهاعرف
لو ليته كانت ليه.
كلمات غير مسموعة
وكانت كلمتى باردة ومخنوقة
بتنقش بسمتى القاسية على جبينى
تواسينى. تنادينى
تعلى أبدأ بإسم جديد
وحرف جديد.. وشكل جديد
وهز الدنيا من شعرك
وبان الأمر فى التكوين
وقتل أبدأ يدون تلوين
وأقول الكلمة بميزانها
ولكن قبل ما نطقها
هموم الدنيا لمتنى ف أحزانها
الطاووس
صدق وآمن يا طاووس
إن النفاق من ريشك المليان شفايف
الكلمة منها بدون ما تعرف تجرحك
والصدق فوق الكلمة خايف يدبحك
صدقنى يآخر طواويس الزمان
أنا رغم إنى بانصحك
كان نفسى أقعد مطرحك
حدوته هندية:
كان فيه طاووس
عرف بأن المسألة ألوان وريش
وإن الحياة ضافر وناب
طلب السماح من بيدبا بالإنتداب..
بصبح غراب
وف يوم ديدان الأرض
ضحكت على اللى كان
ولأن كل المشكلة فى موت الملك
والمملكة ملهاش كبير.. مفهاش أمير
رغم الخلاف المفتعل
الحل كان إن الطاووس هو الملك
والإختبار أبدع طاووس
وقف الملك يخطب ف كل
الغابة ساعة نشوته
وقف الغراب المنتدب..
قال يا ملك
كل الملوك التاج على راسها
أما أنت ليه تاجك على ....؟
أسف أشطبها دى م المضبطة
وف اعتزارى بالتمس
إنك تراعى فى كلمتى
إن البداية ف السباحة بلبطة
إن الكلام خانى
وهى دى أصل الحقيقة المؤلمة
بأى حق تكون ملك
قال الجميع نعمل مبارزه عل الملأ
ونشوف بقى مين الملك
إنت الغراب ولا الطاووس
كان الكلام مين يتغلب مين راح يفوز
مين بعد ساعة ها ينقلب ضده النفوذ
اللى فى ريشه ألف لون
وألا اللى لونه بلون سواد الليل عجوز
والمعركة نتجت عن الريش اللى طار
زغاليل من البيضة ولسه مفقوسين
وعرفنا أصلك يا طاووس
من برة ريش.. جواك مفيش
أما الغراب أصبح خطير
أحسن من الماضى بكتير
مهما يحاولوا يسخطوه ها يكون غراب
أما أنت لما يسخطوك تبقى الحقيقة فيك سراب
والمسألة مش فيك ولا..
ف حروفك النعسانة فى قلب النفوس
أبداً ما كان سر الحياة كدب ونفاق
أو حتى بحر من الفلوس.. ما أجلهلك
سر الحياة لو كنت عايز تعرفه
فى القبر دوس.
الشعر كلمة حق
الماضى يجرح قوى
لما يكون قاسى
تاكل ف عضمى الناس
وأشرب عرق فاسى
الكلمة قالها الولد
ساعة ظهور الحق
سيفى العليل انجرح
بقلوب ما تعرف دق
يا كلامى يا مدفون
من جوا جوا تابوت
الكلمة لو صادقة
ينطق بها الكتكوت
الكلمة حبلت شعر
وف بطنها مزنوق
والكلمة هيه الحق
والحق مات مخنوق
عزيته بالموال
الشعر قام وإنطرح
واللى ف بطنه طرح
أنا خوفى أموت م الخوف
من إنى أموت مخنوق.
باش أغا
صابت عيونى الدهشة..
ف الزمن المباح
رفضك حقيقه.
لخبطت كل الوجود
داخل قوانين النظام المنتهك
فدخلت من باب الخروج
ومشيت خطاوى فى طرقتك
ع الحيط بقع
وبقايا لحم بدون عظام
والعنكبوت عارف حقيقة نظرتك
شافنى الجرس
حاولت أهرب إنما..
باب غرفتك مليان حرس
نطيت من الشباك غلط
مريت من الباب المدجج بالحريم
فكتبت من فوق جبهتى
فارس أغا
مملكش غير شنبى الكبير
وبقايا منظر للخيول الواقفة
قدام الأمير المنتظر.. والمنتظر
الإشارة باهت مزيفه بإيد الوزير
علشان يخش بدون هويه بدون حرس
والصولجان فى إيدين أبوكى بيرتعش
علشان إماره مزيفه
يرميله توبك ع البلاط
ويبص للخاتم ف إيده وينحنى
يصدر أوامر مبهمه
مطلوب ضرورى أسلمك
وأبقالك الآخر طريق
وأبوس إيدين خيل الأمير
ولأنى داخل قصركم
من غير لا سيف
أو درع يحمى مهرتى
وصبحت بينكم باش أغا
طايع أوامر حضرته
طالب بأنى أسلمك
أرجوكى قومى
وحاولى تبقى ليه درع ف وسطهم
أبقالك السيف والرماح
وتكونى ذاتى المعلنه.
أمجاد يا عرب
قضينا الليل
فى برد وذل ومهانه
وكل الخلق دفايه
لأن الصبح بيليل
وفيض الفيض بقا قليل
وسيف الحق بيميل
وحتى الشمس بردانه
لأن الصخر بيصلى..
وموج البحر بيسبح لرب الكون
وإحنا سجدنا ف الحانه
وصبحنا على كاس النبيذ الأحمر
ومسينا على المزه إلى مزانا
وهزانا.. ف زنزانه
بيبانها تايهه بين حانه وبين مانه
نهرول بالسبع تشواط
وما شوفنا غير كلام معسول
بإن الأرض هاتفجر..
ينابعها من البترول
وإن فريقنا متدرب وها يشارك
ف دورة سيفنا م الفرحة
ونجرى وإحنا مش واخدين
خوانه من عزيز عينى
فييحى تحت جنح الليل
بجرئة فار.. يقيد النار
ف نفط بلدنا عرض وطول
مؤامرة من فريق حاقد..
على فريقنا عشان ننهزم
ونرجع تانى ع الناقه
بقلب حزين
فلا يمكن نسيب الكاس
ولا نرجع بخف حنين
ومين يقدر ينازلنا
مصارعه وقوه أغريقى
ومين يقدر يجارينا
فريق الكرة أفريقى
ومين يقدر يعادينا
فريق السلة أمريكى
فنشكر كل من حالف
وبرضه كل من خالف
ونشكر كل من جالنا وكان سالف
ونوعدكم برفض الموقف الواضح
وشجب الموقف الفاضح
من الكروات
وننصحكم تكونوا زى جوز أخوات
وهذا هو موقفنا ولن نرجع
نطق أصغر ولد واقف..
ف سراييفو ما بين السنكى والمدفع
ضميركم سلعة للنخاس
لا دم بيجرى ف عروقكم.. ولا إحساس
بترمونا ورجل الكلب بتدوسنا
وتغتصب النسا وهما على القبلة
وسبتونا نشيل الظلم فوق روسنا
قلولى إزاى تكونوا أهلنا وناسنا
وسبتوا شرفكوا يهتك عرضه..
ف البوسنة
نادينا وقولنا معتصماه
لا شوفنا المعتصم واقف
بجيش أحرار.. ولا حتى
صلاح الدين بجيش جرار
نادينا وقولنا إسلاماه
تعلى الصمت
دى أسرار
ولكن شوفت شئ خلانى..
أتأكد بأن الدنيا لسه بخير
وناس بتموت وضرب بنار..
ومؤتمرات حقوق إنسان
لأن الصلطة كل شئ فيها..
ومسلوطة وناقصة خيار
وفيه ناس فى الصومال ماتو
من الفاقه وقهر الجوع
وبابا نويل بيديهم حنان ينبوع
بيطبط على الأطفال فى إثيوبيا
يركبهم بساط الريح
ويحدفهم على المراجيح
يروحوا يصلوا فى المقدس على المبكى
صلاة الشكر للمطعم وللمنعم
فيديهم سلاح أبيض
بلون الشهد والمرمر
عشان هذا السلاح الأبيض
ينفع ف الزمن الأسود
لأن الدنيا بتمطر حجارة ونازله
من سجيل.. يتنزل
فوق دماغهم سيل
بيرموها ولاد أبابيل
وبيكابروا وهما ف العذاب لسدوم
وصوت الطفل بيزمجر رياح وحسوم
فيحميهم ويديهم حزام أمنى
بيكفى ربعميت مبعد ومستبعد
ما بين الكتلة والسندال
ما بين سفح الجبل الأخضر
وبيم القدس والأندال
وإحنا على الشلت قاعدين
نخزن قات
ونشرب قهوة م المُرة
وبالمرة
سالومى بترقص الرقصة
وهيه الرقصة كات ناقصة
نطبل ليها ونهلل
ونفرد شعرها ونجدل
حبال ناعمة بخنقنا
وترمى التلج ف عروقنا
غروبنا يشد ف شروقنا
شروقنا يشد ف غروبنا
مغارب يا جزايريه
وليبيا يا تشايديه
قطر نجران يمانية
جيزان بحرين سعودية
حلايب أرض مصريه
ومكوكهم يتغذى على عطارد
ويشرب شاى على الزهره
وإحنا لأ
وهما ركبوا ديسكفرى
وإحنا لأ
وليكا طلعت القمره
وإحنا لأ
وليه نلطع؟
وعندى عقد ملكية
بإن قمرنا دا قمرنا وهما لأ
بنمشى ف ألف ميت سكه
ونطلع منحدر بالزق
من المغرب لغيت عكه
صحيح عكه
زرعنا التمر لما إحدق
إيدين ف إيدين بنتعاهد
تعالوا نختلف ف الحق
وندبح صقر فوق أيكه
يشوفنا الغول يخاف ويرق
عشان فرسان ولاد فرسان
عنيتر يبقى من نسلى
وأبو نواس زميل فصلى
ولما الأعشى بصبصلى
وع الخيمه ربط جديه
وشغل كام شريط فيديو
عرفت بأنه بالوبيه
فاسيبته ورحت على طيبه
وقلت كفاية.. أيه هاخد
من الطيبه
رسمت القصة فى مسلة
وسيبته هنا مع الخيبه.
قـــدر
صحيح سامعك
ولكن كلمتى واقفه ومخنوقه
كما عود النسيم الأخضر
فى وسط النوّه والإعصار
أنا شايف
ما بينى وبينك حاجز
فراق يمكن.. دمار جايز
ومش عارف أسد الهوه إن أمكن
ومش عايز أقف
مكتوف وأنا عاجز
وشايف بوابات العمر بتفتح
فى قلب جدار نهاية عمرنا الباقى
أزيل الخوف وأتبسم
وأشد الصورة جوايا
وأعصرها ف تكوينى
ملامحك تبقى فى صورتى
وصورتى تبقى فى عنيكى
وأمر بحبى م الحاجز
عشان أهرب من المكتوب
تقع صورتك .
بأرفض أكون
هامش:
إن كنتى إنتى التوهه..
والصمت الرهيب
فأنا الحقيقة المؤلمة
أنا صلب صلب المشكلة
وإنتى النخاع
قصيدة:
أنا بأرفضك
بارفض ضياعى ف الضياع
رافض بأنى أعيش..
هلامى الشكل مفقود الهوية
أو أنى أحضن ف المشاع
أو أنى أرمى الكلمة
ف بحر العواطف للأبد
رافض أكون سارى الشراع
رافض أكونلك فى الهوا..
إعصار وريح
أو إنى أبقى للسمك نورس جريج
فأنا بأرفضك.. أنا بأرفضك
بأرفض أكون كذاب صريح.
بين القصرين
من بين حواديت الحسين
شفت الخرنفش والزقاق
وعيشه وحسين الفطاطرى
لما كا بيحبها
ف ملايه لف تروح..
وتمشى فى سكته
على إنها..
هاتجيب بخور أو مستكه
للمبخرة م العطارين
أو م الغوريه تجيب مغات
للواد حسين إلى إتولد
على كوم بنات
أمه اللى ناويه تزفه فى وسط البلد
على فرصة بيضه مخصبه
بدم عجل هايدبحه
جوزها المعلم مصطفى
وف قهوة السيد حسن
قاعد خليل
واللاثه بيضه معلمه
عمال يطقطق ف الحجر
وأحمد أفندى ف الديوان
لما يعدى من الزقاق
طربوشه لازم يتعوج..
على جبهته.. ومنشته
عماله تنكش ف الهوا
والمشربيه تنفتح
وتبيان وراها اللى استخبت م الجدع
يبرم شنب.. ويسبب شنب
وخديجه باليشمك تعدى ف سكتك
خلخالها شن برنته
من حسنها
قلب الفتوه يتخلع
سى السيد أحمد كان صحيح
وعبده بياع اللبن
والواد شلاطه الأهوجى
وحتى إسماعيل المكوجى
ساب الجاكته تتحرق
علشان يرد بألف ميت مليون صباح
زى العسل.. ع الميت نجف
ولاد حارتنا طيبين
حارة البرابرة واليهود
خان الخليلى والتحف
وقصر شوقك ينفتح بين القصور
السكريه كلمتك..
حتى الفيشاوى ف الحسين
أصبح عيون أهل الأدب
وأنت السبب
لما تخلى القاهره.. جوا الحسين..
كلمات كبيره.. بين إيدينا معطره
لما نشوف صدق المعانى ف الكلام
نركب ونبقى فى مركبك
دا لأن مجدفك صحيح
أصبح قلم وأنا بأكتبك
عروسه البحر
مديت فى الميه إيديه
شدتنى عروسة البحر
باركتنى وطلعت بيه
بدر ف ساعة الفجرية
خلتنى أسيب الناس
وأفضل طلوع الفجر
قاعد على شط النهر
تطلع وتقولى كلامها
آخذ من صوتها حنانها
وتقولى أطلب أديلك
إخلاصك هو المهر
وتقولى سلام وهاقبلك
مع أول ضوء للفجر
قاعد مستنى حنانك
فاتت ساعه على الفجر
فستانها الأبيض ناصع
عايم على وش الميه
والدم فى صدره بينزف
والدمع ف عينى يرجف
ورجعت وحالف لازحف
فى طريق الشوك الوردى
وأزرع وأروى بدموعى
تفاح الدنيا لامر
إزاى الحال
صــــــ129
