(الجزء الثالث)
إزاى الحال
إزى حال الكحكحه
متبحبحه والحمد لله
شد الحجر وأوعى يا صاحبى تولعه
عضمك صحيح بارز من الكتف الشمال
والتانى من ضعفك مقوس منحنى
لكن عليك حتة نفس
كسر وطقطق ف الحجر
الجوزه صاحيه مغمسه
أزى حالك ف الصباح
دايما باشوفه فى المسا
تلعب قشاط؟
إلعب وشخشخ فى الزهور
وتيجى زى ماعزتها
طبعا بتقرص ف الدبش
لأ يا صاحبى دا الدبش
هو اللى قارص نظرتى
والحالة محبوسة بقشاط
والطبع ف اليك إنحبس
جتلك خشب
والفوره صايمه أخدتها
ما تجيب يا واد عاشر حجر
والجوزه هاتها متلجه
الراس بقت زى السما
فيها السحاب لن ينقشع
هاتلى هنا حلبه حصا
وعايزها تبقى ملهلبه
إغليها ع النار بالقوى
وإفتح للى دفتر ع الحساب
إزى حالك فى الربيع
شايف ضباب
والناس كتير
لكن لوزهم مش لوز
صبحت تروس
عمالة تاخد من عيونا الدّيقه
وتحط أفكار ف الرئه
صدرى إتخنق
مخى أتزنق تحت العظام
والعضم عايز ينفجر تحت الجلود
فوق اللسان حضنت خدودى بعضها
والجبهه فيها الكرمشه
حضناك عرق
ورموشه جالها الثعلبه
وودنا صبحت أرنبه
شد اللجام.. الكام بكام
وجيوبى بيضه ممششه
صليت وصمت ولم أبح
إنى هنام بعد العشا
الكلمه سراب
الشاعر ليله إمبارح
راح مشوار
فأتذكر إن الناس قاعدين يستنوا..
فقال على نفسه مهم وغاب
شدوه ضربوه
لعنوه وهانوه
حطم قلمه.. كسر الأوزان..
قطع أوراقه وقال يا كلاب
هزوا ديولهم
مشيوا ساكتين
لكن كانت..
ف وشوشهم بسمه وقول كداب
الشاعر فكر ساعة غضبه وقال..
أنا لازم أكون سكينه وناب..
جهز خنجر وسهام ونبال
وخيول لشجرة الدر وكام قباب
الشاعر قام لبس الخوزه
علق درعه وشد لجامه وقال
أبو زيد إتحدى زناتى خليفه
وكل الناس ساكتين
شفايفهم زى رمال الصحرا..
فى صمت الكلمه قالتلته دياب
الشاعر ساب من إيده السيف
فك الخوزه
حط الميه عشان تشرب كل خيوله
علق ع الباب
أنا شاعر لكن مش ممكن
أتجرجر من قلمى وراكم
وأتحدى سراب.
الشيطان التائب
برغم القسوة والحرمان
برغم التوهه والأحزان
برغم ضياعى ف الأيام
باحس إنى بقيت إنسان
.....................
وأيامى مع الماضي ما تشفعليش
بإنى حتى أخش النار
ولا أطلع من العفريت
وإن حتى عمل ميت زار
وإن شافنى ف يوم فاجر
بيسقيه الحشيش خَمّار
يقوم يجرى يسيبلى البار
......................
وإنى كنت أنا وإبليس
بنلعب لعبة الكون كان
وفلسته كتير ياما
وجيت مرة أروح له البيت
هرب منى وعمل عيان
....................
برئ منك يا روما نيرون
أنا اللى كنت يومها..
فوق جبين التل بتدفى
وعاشق نار
وحالف إنى أخلى الليل سكونه دمار
وأخلى الفجر شعلة نار
وأعزف لحن أعمالك وأعمالى..
على القيثار
وأضحك ضحكة مخنوقة
وأبكى بعزم ما فيه
وأحط إيديه ف إيديه
وأعصر نفسى أتألم.. وأتندم
وأشيل كفنى وأنسى التار
وأعرف إنى مش لازم..
عشان إنى ف مهب الريح
أكون إعصار
ومش لازم عشان واخد على التجريح
أكون جبار
ومش لازم
عشان الميه منى بعيد
أكون صبَّار
ومش لازم عشان البرد قطعنى
أكون فى النار
ومش لازم.. ومش لازم.. ومش لازم
ولكن ما هوا لازم
بأنى بين خلايا الشك والتوهه العنيدة
فى بدايات إختيار.
جلنار
قطعت بالسيف الأبى..
خطاب التتار
أتجمعت حواليك قلوب الناس..
جميعا بالنهار
علشان عقيدة مهلمة
خليت قلوب الناس تتدوب
يقفوا عشان الحق..
روحهم ع الكفوف
كان الولاد لون الجبال
وأمامهم الجيش الحقود
م الحرب تاه
عمال يدمر كل شئ
قاموا الولاد
واقفين أمام جيش الجراد
وقائدهم الشاطر قطز
نادى وقال جنيكزكوا خان..
عهد التتار
مرعوب وخاف بعد ما شاف
فوق فى السما نور الحقيقة
من الإله
نزاله تهز الكون
وواقفة بين إيدين الشعب نور
جنكيزكوا بص..
لضوء سيوفهم إنما..
الضوء عماه
ولما نادينا بكلمة الحق الوحيدة..
تهز زلزال الزلزال زلزلة
واإسلاماه.. واإسلاماه.. واإسلاماه
إتحرك البركان بنار..
اللى إتكووا بظلم الجيوش الطامعة..
فينا ف ليل الإنحدار
على رأى أبنودى البلد
الليل جدار..
( لو يدن الديك من عليه
يطلع نهار )
خرجت سيوفهم دامعة..
بدم الملوك المفسدين
داخل قرانا الطيبة
جولنا فى يوم..
علشان يذلوا عزيزنا بالذل الذليل
لكن بلدنا مقبرة لكل الغزاة
فى الزحمة شيخنا سلامة تاه
ومعاه جهاد
لكن ف لحظة ما نده..
يوم الوعيد
ركبت خيول كيوبيد
لبست ملابس عيد
دقت قلوبهم آه
أصبح طوفان جارف
كان م الطوفان خايف
كل التتار مراعيش
أمام حبيب جلنار
علشان حنان الأرض
ف القلعة والأزهر
قام هدهده ونداه
عشق الولد أرضه
وعاهدها على إنه
زى ما عاش فيها
تديله من نيلها
فى البرد بتضمه
إنه يكون فارس
إنه يكون فارس
وإنها أمه.
وردة
يا ورده بيضة مقدسة
بين الورود.. زى القمر
ساعة كماله فى السما
خايف وعينك لم تخاف
كانت نبال
صابت سهامه مهجتى
والجرح كان دم الغزال
والنظره من عين الرشا
شافها الصبى
فتح الرئه وحط فيها نظرته
غمض عيونه وانتشى
حسن بحاجات..
عمره ف حياته ما حسها
إنه ولد وإنتى.. يا ورده مؤنثه
قام وارتعش
رفض السكات
حاول يكون أستاذ..
ويديكى العواطف مخلصه
لقاكى فصل ومدرسه
الخيانة
مش هاظلمك
قلمى لوحده هيألمك
من كتر ظلمك ليّه أنا
صرخ الألم جوايا وإتهد الكلام
أصل القلم
عودته إنه يوصفك
ويكلمك ويرسمك.. زى الملاك
ظلمت أنا لوحدى القلم
وأنتى ظلمتينى على ظلم القلم
من كام سنه
حبيت أنا فيكى الطفوله المبهه
حبيت أنا فيكى الحنان
كنتى الفراشة الناعمة
كنتى حروف السوسنة
كنتى وكنتى كل شئ..
لكننا
كنا بعاد عن بعضنا
وأنا بعصرك من بين ضلوعى
وإغزلك شريان فى دمى بس ناسى
جرح جوا ف قلبى دامى
ساعة يفتح.. ساعة يقفل..
ساعة يتحدى إنهزامى
صدقينى
لما ينزف دمى فوق ورد الكلام
هابقى ميّت مطمئن
وأعرف إنى من حياتك إنتهيت
بس لما ألاقى دمى
جوا شريانه بيجرى
جوا شريانك بيجرى
وانتوا واقفين من قصادى
مش هايبقى شئ جميل
لأ هايبقى المستحيل
صدقينى مستحيل
وأن مش ها حاول أظلمك
لكنما.. قلمى حروفه..
هتألمك وتعلمك
إزاى تحبى بدون خيانة.
دفاعى شرعى
شكى فيه
حتى قولى إنى بخونك
حتى قولى
إن جوا فى نن قلبى
صورة ليكى باهتة جدا
يعنى قصدى مش بلونك
رغم إنك راسمه ليه فى كل كلمة
صورة ألوانها الخيانة
فاعذرينى لو هأقولك
مهما كانت صورتى عندك مش هاخونك
مش لخوفى من أسية كلمة باردة..
أو لخوفى م الجرح
حبى ليكى شئ فى قلبى..
سرى جدا
لأحترامى لذات كيانك أو لأنى
كنت باحلم
إنى أكونلك
طير صغير جوا عشك
بس حلمك كان سراب جوا العواصف
كان بيحلم
إنه ينحت ف الرياح
رغم أن الحب بينا كان فى لحظة
غير مصرح أو مباح
فاسمحيلى أكون محامى
لأن حبك كان ها يعلن نفسه قاضى
كان ها يرضى فى لحظة
إنى مكنش راضى
إنى أرفع راية بيضة..
يعنى أرضى بالإدانة
إنتى عارفه
تعمل إيه فيّه المبادئ
لما تلقى تحت كعب الجزمه عندى..
حتى حرف من الخيانة
لما قلبى يدق ليكى
يجرى دمى فى عروقى يحس بيكى
لما عينى تشوف للحظة
خاطفة لامحة طير معدى
بسرعة جدا فوق رموشى
إبقى قولى إنى خنتك.
سؤال
فتح ليه الطبيب صدرك
خنق فيه الكلام لحظة
ما شاف صورتى ف خلاياكى
ما بين قلبك
خلع شريانك التاجى
عشان يمحينى
من داخل شرايينك
وحاول إنه يمحينى
ويمحى فيه تكوينك
ألاقينى برغم الغربة جواكى
بإصرارى على جبينك
وشوق ف لحظة اللاوعى..
بالمكتوب فى جوايا
خيوط القلب تخنقنى..
ف لحظة شوق لإعدامى
فحاولى بكل إصرارك تخبينى
ما بين آخر زواياكى
ف داخل جسمك الدمى
بيسحب فيكى من دمك
بقسوة إبرة ملعونة
بتديكى.. خلايا غير خلاياكى
وآه.. من جرحك المفتوح ف جوايا
بصحوة موت تنادينى
صحيح سامعك
ولكن كلمتى واقفة ومخنوقة
كما عود النسيم الأخضر
ف وسط النوة والإعصار
أنا شايف
ما بينى وبينك الحاجز
فراق يمكن.. دمار ممكن
قدر جايز
ومش عارف أسد الهوة إن أمكن
ومش عايز أقف مكتوف وأنا عاجز
وشايف بوابات العمر بتفتح
ف قلب جدار نهاية عمرنا الباقى
أسد الباب
وأكره كل من فتح
بيبان كانت لازم تمشى
وأمر بحبى م الحاجز
أشد الصورة جوايا
وأعصرها ف تكوينى
ملامحك تبقى ف صورتى
وصورتى تبقى فى عنيكى
وأرجع تانى م الحاجز
عشان أهرب من المكتوب
تقع صورتك.
مهرة حبيبتى
مهرة حبيبتى لو تبوح بالجرح..
يبقى اللى انجرح قلبى الحزين
شدى اللجام على قد خطوة سكتك
وخلى جرحك ينكوى وينطوى
تحت العيون الساهمة جوا المدى
خايف عليكى من المُدى لتجرحك
تعالى حبة أدربك
ع الوثب فوق المجروحين..
الفرحانين بالجرح لما يتفتح
وهما عايشين لذته
لون الألم بيعذبك
وبيسليك أجمل شعور
لم بإيدى أدوقك فستق ولوز
وأغريكى بالسكر وقلب بيعشقك
جوا السبق
الجايزة فى الآخر نبأ
إنى على السرج انحنيت
علشان أداعب وجنتك
وشعرك الطاير سرح
وغطى عينى وجبهتى
وحلمت إنى بقيت فتى
الصيف ف قلب الليل شتا
حبات ندى إتجمعوا فوق جبهتك
يبنوع من الشهد النقى
مقدرش حد يجريه
وخيالى مهما يروح بعيد يستوعبه
فلتسمحيلى أحرسك
الفجر م الصبح انسرق
السهم ف القلبين مرق
والقوس فرح
وحط إيده على الوتر.. سلم عليه
سمعت لحن كمنجتك فوق الشعور
خلا المعانى ف قلب ليل الضلمة نور
الضوء يفور.. ويلبسك..
توب الملايكة أم جناحين
طارت هنا ..وطارت هنا
وانا روحت فين !
مأمن عينيك ديارا
بحبك والعيون صافية
بحبك والعيون دافية
بحبك والعيون مرسى..
وضليلة وحضن ودار
.....................
حبيبتى يا وطن قلبى
بحبك لحن أوتارى
بحبك يا قمر ليلى
بحبك شمس ف نهارى
وعينك كل أحوالى
سفر ليالى وترحالى
رجوعى فى آخر المشوار
صحيح المد ودانى بعيد عنك
خطفنى الجزر من إيده
وخلانى شراع وانتى..
حنان مركب ودفة حب..
خلتنا عبير نسمة وموج وبحار
طرحنى الليل على طرحى
لقيت فرحك طرح فرحى..
مسح دمعى
وحط البسمة فوق جرحى
ونستنى بأن الشمس ف غروبها
وإن الليل طويل جدا وخلانى..
أعيش ساعة أدان الفجر أدعيلك
ويبقى اليوم ضيا ونهار
.................................
جرائة فكرك الواعى
حنانك فيض بيملانى
شعورك همس وأغانى
وشعر ورسم بالإحساس
يا واضحة بين جميع الناس
ف رقة حبك الهايم
كما الريشة على الأوتار
...........................
يا أرضى يا سما روحى
يا صوت النبض ف عروقى
بأيد حنية فوق كتفى
يا مسحالى جبين عرقان.. وأنا راجع
ف إيدى الحب والبسمة
وإيدى التانية أيامى
تقابلينى .. تشيلى معايا أحلامى
ونحلمها بحُرية
ونبقى زى صوت عصفور وعصفورة
ونبنيها على الأشجار
أحط عنيه فى عنيكى
وتبقىعنيه ليكى نهار.
لحظة أمل
أنا لما حبيتك صِحّْت
كل الشموس من ضلمة الكلمات
وباتت تستحمى بالقمر
كان عطرها لحن النجوم
والنسمه فاتت ع الزهور
أخدت جمالها وعطرها
رقصت بتوب الانسجام
كان نفسى أنام
والحضن كان مهد وغطا
ساعة كلامك مأنتنى بين الضلوع
البحر هدى المركبه وفك الشراع
والموج صبح زى العريس يوم دخلته
عايز يكمل فرحته برقصة غزال
قدام حبيبته الناعمة ذات الكعوب
اللى فى قلوبنا بتنغمس
الليل همس
ف مرايه خضرة ومبهجه
بفراشة نايمة من زمان
فوق الغضون
لونها بيفضح حسنها
حتى النسيم اللى ارتعش
خايف ليجرح حضنها بعطر الزهور
جالها على طروف القدم
الواد ندم
إنه محبش من زمان
ذات العيون المبهمة
الحلوه كانت ملهمه لشعر الجدع
لما غرق جوا بحور التفعيلات
كانت فى إيده طوق نجاه
بيشده للحضن العفى
الواد دفى
والقلب أصبح زيرفون
عرف الكلام لحن الجنون المستباح
رسم عليها التوب وراح
جت له بعباية مطرزه
حطتها فوق كتفه اليمين
وهيه فوق كتفه الشمال
نامت وطرحت شعرها فوق خدها
لفت صوابعه جدايل الكلمات بدون
ما يهز حرف المسألة
الواد حلا ف عين القمر
قام استخبى من السحاب
والبنت فتحت حصنها بحر الحنان
دابت شطوطها ف ميته
من نشوته
ومعدش موج بيهز موج
ولا حتى شط يحدهم
كانوا زمان إتنين سوا
الوقتى تُهب ف عدهم
عنيكى سؤال
عنيكى نجوم
بتسرق صمتى من ليلى
وتدحبنى.. وتطرحنى
وساعة الفجر تحيينى
بداية شئ
وتطلع شمس دفيانه
تمد إيديها فوق خدى..
تصحينى
من الحلم اللى أنا عايشه
أفوق وأفتح زرار قلبى
وأشد الضوء على ضلوعى
تخش ضلوعه بالراحة
وتبقى الشمس مرتاحه
وتبقى الشمس من ضوءه
عينكى شروق ملوش آخر
تبات فيه الطيور واقفه
على غصنك
وتيجى من بعيد جدا
وراها الشمس ضليله
وأفتح رمشى ف جفونى
ونتبادل مناظر عايشه جوانا
صور أحلام مع الماضى
حصان أبيض .. وأنا وإنتى
يغطينا.. تهادل شعره فوق وشى
يطير بينا
ونبقى بين سحاب عايز
يدوب فينا من الفرحه
ونديله الحنان صافى
يمطر فوق ورود قلبى
أمطر فوق خدود عينك
عيونك هيه مرسايا.. وتفعيله
ف بحر الشد والمد العنيف جدا
أنا معنى ورمز وحرف ف جفونك
بلا ش نوزن ف أشعارنا
أنا فعلا بحبك وإنتى أفعالى
وفعلالى مفاعيلك
فلا هافعل فعيل عنك
ولا هانسى تفاعيلك
وهاتفعلل
وهافعل نفسى من فوق رمشك
قصيدة شعر.
لقاء
آدى إديه..
مدى إديكى..
يلا احكيلى..
عامل إيه البعد معاكى
كنت معاكى؟
ولا ف لحظة ما تودعنا
شيلتى حكايتى من جواكى
ولا لأنك معجبكيش الوضع معايا
لأ صدقنى كنت باحبك
كنتى وكنت.. كنتى وكنت
ولكن لسه وها فضل أحبك
بس إيديه مش ها تكون أبدا ف إيديكى
يكفى بأنك وانتى معايا
رمشتى طرف عينكى السودا
لواحد غيرى.
بدايه
جذبنى لخطوتك دربك
أنا ها تحدى بيكى الناس
بقلبى وبنسيم وردك
أنا سلمت بالمكتوب
ويوم ما حاولت أتحدى
كسر فيه العناد قلبك
وخلانى أهد الخيمه والمحراب
وأسحب م الجفون ليلى
وأشوف الفجر بينبت
على غصون الشجر أزهار
يروح الحزن من عينى
وأشوف الضلمه فيكى نهار
حاولت أشرب من الزهره
لقيت الغصن ف ضلوعك
وكاس الزهر فى الأنهار.
سراب
وماشى لوحدى فوق شطك
وبحرك موجه بيقرب
وشايف فى الخيال حاجه
بتتغرب وتتسرب.. ما بين الموج
بتتلاشى وتتحاشى رياح جايه ف سكتها
ركبت الموج.. وباتحدى ورحلتها
لقيت بحرك هدير خايف
ومركب حبنا واقف.. ومش عارف
بإن فنارى متهدم متحطم
ركبت ف مركبى تانى
ومن تانىجرفنى الموج..
ف بحر الشوق.. وبعترنى
ندهت عليكى لمينى. وضمينى
لقيت من بعيد جايه
وصوتك من بعيد جايلى
بيترنم بسيمفونية العوده
جريت لك شايل اللهفه
وناسج م الأمل ورده
ولكن قبل ما أوصلك
لقيت حاجه بتندهلى
وتقولى.. أنا بكره
صحيت من نومى من حلمى
وأنا عاتب على بكره.
دوايــر
دواير.. دواير
فى نص الليالى
تدور عليه
تغمى عنيه
تبعتر ف وسط الشوارع أمالى
دواير.. دواير
وشوقى اللى طاير
بيزرع سنابل
وشايل همومه ف شنطه تفاؤل
ودمعى اللى عمره ما غرق جدودى
تعدى حدوده
تعدى حدودى
ولكن هاكمل واواصل وهاوصل
واخضّر جميع الفروع اللى دبلت
وهارسم دواير
دواير جديده.. لدنيا جديده
وهاشطب دوايرى القديمة العنيده.
دوامة الحروف
تاهت معانى الكلمة والرمز اتحرق
وحروفى لفت بعضها
نزلت فى دوامة غرق
وغرقت أنا
مع كل كلمة مت حروفى على الورق
مش لاقى معنى للكلام
ولا حتى عارف سكتك
عنوانك المبهم غلط
وحروفه ليه متلخبطة
نورك بعيد خلانى أمشى على الطريق
وأوصل وأقول.. كلمة بحبك إنما
كلمة بحبك نفسها
تاهت حروفها ف بعضها
داوود
أنا مش داوود
علشان يلين ليه الجديد
فمتطلبيش المستحيل
ومتطلبيش إنى أخطى
ف خطوة واحدة ألف ميل
واسألى نفسك سؤال
واعرفى منى الجواب
أنا ليه باقول إنك سراب
ليه وليه.. وألف ليه
مليون سؤال يتهزوا فيّه
يتفجر جوايا ميت مليون جواب
اخنفينى وهزى فيّه وعيطى
أصحا من غيبوبة الكره العنيدة
وارتعش من كتر حبى
ألقى جواكى الجليد هو الجليد
والحديد هو الحديد
أحط إيدى جوا جيبى
وأمشى فى عكس اتجاهك
اعتذار للشعر
إعتذار للشعر
أنا آسف
وأتحدى فى يوم واحد
يكون أسفه بلون أسفى
وأتحدى فى يوم واحد
يكون قادر
على إنه يواجه مُر أفعاله
ويخنق نفس بحباله
لأنه فى يوم..
بخل باللولى والمرجان
ف تفسيمة على بابا
وساب الست مرجانه
ما بين الزلعة والزلعة
بتحلس ف العسل الأبيض
لأن البخل ف حروفى
لأن الكلمة منقوشة
على خوفى
لأنى كمن مش قادر
أقول الكلمة بميزانها
فلو كنت بصحيح شاعر
رماحى فين مدافعها
سيوفى فين مدامعها
فلا هاقدر أكون فارس
ولا حارس على الكلمة
وإنا تاه الكلام تانى
وكان الكل بيطاطى
وتاه العالى ف الواطى
فأنا آسف عليك جدا
وأنا من جملة الشعرا
وكلمه هاقولها من قلبى
وأنا صادق
بإن بعيرنا هايدلك
على الشعرا.
نجمه
يا نجمه فى وسط السما
خايف عليكى من السهر
داب القمر من رعشتك
دابت معاه كل النجوم
ويقينى إنتى ل السما كل النجوم
يا نجمتى يا صغيره
يا أم الرموش الخجلانين
فكى الضفاير
فوق كتافك قربى
يا نجمه فى وسط البشر
شافك معايا من السما
ضحك القمر
ضحكت معاه كل النجوم السهرانين
فكى الضفاير واطلعى
فوق فى السما
خايف عليكى من البشر.
الكلب أرنوب
الكلب لما يحلم
بقطه لونها أبيض
تخاف وتجرى منه
وبيان بإنه كلب
واعى وشهم وجرئ
بيفهم ف الحراسة
وعارف ف الأصول
لا عمره هز ديله
ولا حتى ساب ودانه
لصاحبه مدلدين
الكلب يوم حراسته
شاف العصابه جايه
ناويين يخشوا بيته
وياخدوا كل حاجه
الكلب صوته عالى
لكن ومين هايسمع
كل البيان حديد
فاضطر إنه يصمد
رفض كل العروض
ورَّد ألف عضمه
بعتوها للمساومه
لإنه كان أمين
الفجر لما شقشق
دخل عشان يتمم
خرج يهز ديله
وودانه مدلدين
زعل وقال لنفسه
ياريتنى كنت أرنب
أروح للقطه مره
وأروح للبطه مره
وأروح للكلب مره
وبيقى كل أكلى
الخس والجزر.
الضربة القاضيه
الجولة خلصت والنتيجه مؤلمه
رن الحكم صوت الجرس
والجوله
لازم تبتدى
حطوا الكاوتش ف بقى
لازم أتخرس
والقفازات ف إيديه
لازم تختلس
من وش محبوبك معانى الإنهزام
أنا يا حبيبتى مش ملاكم
ف وسط الزحام
أضرب ولازم أنضرب
ضربات حقيقى مؤلمه
ف الركن كان الإلتحام
ليه الحكم بيعد لك؟
الضرب من غير ما انضرب
الضرب كان تحت الحزام
رن الجرس
طلع المدرب هزنى
خلع الكاوتش من السنان
فك الحزام والقفازات
رن الحكم تانى الجرس
والجوله لازم تبتدى
أنا يا حبيبتى..
مش باحب الإنتحار
بين الجبال
لماذا حبيتى البطل؟
أنا يا حبيتى هاكون كلاى
أضرب وأحاول وأبتعد
الضرب كان تحت الودان
مجموعه كامله مكثفه
وقع البطل من غير كلام
واحد.. وقلبى بيتنفض
إتنين..شهيق من غير زفير
تلاته.. فين راح الهوا
الرابعه.. صوتى بينحبس
الخامسه.. كان الإنفجار
الساته.. قوم
السابعه.. موت
التامنه.. قام ليه الغبى
التاسعه.. عينه مزغلله وإيديه حطام
العاشره. كان صوت الجرس
ولبست من تانى الحزام
كووره
بدأ المتش
بدأ المتش بشوطه طويله
شاطها مدافع كان بيدافع
عن منطقة المرمى بحاله
وخانه الحظ
خانه الحظ بشوط صاروخ
جت ف العارضه
لحسن الحظ
وآه ع الحظ النايم ليهم جوا الشبكه
وليه بنشوط؟
شوط وأتمتطع.. جيب ميت جون
مين راح يسمع
مين هايشوف
واللعيب الخصم يا كابتن
جوا الساحه حجاب مكشوف
ضربه مباشره وشاطها اللبرو
وآه م اللبرو لما يشوط
شوطه الطايشه ف وش الناس
زى الفاس ف الأرض الخضرا
وآه من لاعب وسط فريقهم
لما يّرقص
مين هايطبل. مين راح يرقص
الجمهور ولا اللعيبه
وينج شمال.. وينج يمين
راس الحربه ف قلب الجون
إحنا الجون
بس الكوره تسلل واضح
حتى الرايه البيضه إترفعت
والعيب ما بيعرف رحمه
حامل رايه وحيلته قليله
حامل رايه وإيده تقبله
وآه من الدرجة التالته الترسو
عاملين ضجه وعاملين هيصه
جمهور صاحى وواعى وحالف
إن المتش يبوظ بالطوب
والهتافات العاليه العاليه
واخد كام.. واخد كام
هات النص وسيب النص..
نفض جيبك
وإطلع ف المقصوره وبص
تلقى فريقك كان لعيبه
وإحنا الكوره
بس طلعنا يا صاحبى الآوت.
رباعيات
شاف الغزال صورته جوا المريا كبير
ضحك فتح بقه.. بانت سنانه كتير
لو كان فتح عينه
كان شاف وراه الأسد وإن المرايا البير
.......................................
البقر ريّش وطار
والأسد ف الساقيه دار
واللى ناصب مصيده للقط فار
والحمار هو الحمار
...................................
بينى وبينك بحر
والموقعه حطين
إن كنت قلب الأسد
أنا صلاح الدين
...........................
يا بنى بلاش ولَدك
تبكى عليه وتنوح
إن جالك الطوفان
إعمل سفينة نوح
لو تقتلوا الفلاح
تلقوا الغيطان بايره
دا الجوع علينا كاس
بس مش دايره
............................
يا سيفى يا بتار
إبدأ ولا تختار
علشان يخاف الأسد
م اللى حصل الفار
...........................
لما الكلاب تعودى
والدنيا هس سكوت
يبقى اللى جانى وصل
شايل ف إيده تابوت
.........................
طارت نجومى من السما وغاب القمر
أحزانى لمت بعضها واتكومت ساعة قدر
السقامات.. قبل إمامات
كان ساقى كل الناس وعندى واتعطر.
الفهرس
الشاطر حسن.................................................
طيارة ورق...................................................
الخلاص .....................................................
فى العاصمة ..................................................
العالم الثالث...................................................
شاه بندر التجار ..............................................
عيون ........................................................
ساندوتش للكلاب..............................................
المطر........................................................
عرف الديك...................................................
الفاكهة المستحيلة..............................................
الحالة جزر...................................................
المزاد ........................................................
الملمة.........................................................
حكاية إلاه.....................................................
حالة صيف ..................................................
الكلمة مشم ممكن تموت ......................................
علشان تكون .................................................
عملية إجهاض................................................
على بابا والأربعين شاعر.....................................
حصار المخيم.................................................
اليخت بخت يا عين...........................................
كلمات غير مسموعة..........................................
الطاووس.....................................................
الشعر كلمة حق ..............................................
باش أغا......................................................
أمجاد يا عرب................................................
قدر...........................................................
بأرفض أكون.................................................
بين القصرين.................................................
عروسة البحر ................................................
إزاى الحال..................................................
الكلمة سراب .................................................
الشيطان التائب...............................................
جلنار ........................................................
وردة .........................................................
الخيانة .......................................................
دفاع شرعى...................................................
سؤال.........................................................
مهرة حبيتى...................................................
مأمن عينيك ديارا ...........................................
لحظة أمل ....................................................
عنيكى سؤال .................................................
لقاء ..........................................................
بداية ........................................................
سراب .......................................................
دواير ........................................................
داومة الحروف ...............................................
داوود.........................................................
اعتذار للشعر ................................................
نجمه .........................................................
الكلب أرنوب ................................................
الضربة القاضية .............................................
كووره .......................................................
رباعيات......................................................
