حالة صيف
مرت سحابة صيف
صنعت قمر مخنوق
علشان يقول كلمته
لكن في صوته شقوق
تحت السما سراديب
وف قلبه كام خندق
عمال يلف يدور..
داخل مجراته
ينطلق ويتألم وهو فى سكاته
لكن ما زال فضة..
فوق الوشوش بالليل
بحاول أتدارى
في يوم قيامتنا..
علشان أتوه من النار
وتقوم على الواضحين
لغمطت وشي بطين
مليان حصا وغلة
نبّت على خدي
عضم الدرة البلدي
ولعة في أرجيلة
وهربت من جلدي
دورت ملقتهوش
شدو العروق مني
صرخ الولد صوتي ولسه مسمعتوش
فتح الكلام عينه ملقاش
عليها رموش
طلعت حاجات ليه
عفاريت في آخر الليل
من عينه ما بكشش
ضربوا عليه الهون
والهون ما يرنش
لما الولد سبع
جاي م السما محمول
رايح لها محمول
لكن ومين يسمع.
........................................
ـ قصيدة (حالة صيف) نُشرت فى موقع دنيا الرأى رابط :
http://pulpit.alwatanvoice.com/articles/2012/01/23/249072.html
